Тошкент ҳайвонот боғига илк жирафа келтирилди

Ўзбекистон аҳлининг кўп сонли талабларини қондириш мақсадида Тошкентдаги ҳайвонот боғига болаларнинг энг севимли Африка жонзоти – жирафа келтирилди. Бу ҳақда Тошкент ҳайвонот боғининг расмий сайтида хабар қилинди.
 
Қозоғистоннинг Олма-ота ҳайвонот боғи ўз бағридаги 3 ёшли жирафани Тошкентдаги ҳайвонот боғига топширди. Алатау лақабли жирафанинг ота-онаси Хан ва Грация 2003 йилда ЖАРдан келтирилганди.
 
Айтиш керакки, Алатау узоқ масофалик йўлда қийналмаган, мамлакатимиз об-ҳаво шароитига тезда кўникиб кетган.
 
Аслида жирафалар дунёдаги энг баланд бўйли жонзотлар ҳисобланади. Уларнинг бўйи қарийб 6 метргача етиши мумкин.
 
Жирафалар ҳақидаги қизиқарли фактлар:
 

• Янги туғилган жирафанинг оғирлиги 100 килограммга тенг бўлади.

 

• Жирафаларнинг оғирлиги 1900 килограммгача етиши мумкин.

 

• Жирафа юрагининг оғирлиги 12 килограммга тенг.

 

• 1 дақиқа ичида юрак клапанидан 60 литр қон айланади.

 

• Жирафаларнинг тили узунлиги 40-45 см келади.

 

• Жирафа танасидаги чизиқлар асло бир-бирини такрорламайди.

 

• Одатда жирафалар 10 йилдан 15 йилгача ҳаёт кечиради. Ҳайвонот боғида эса 25 йилгача яшашлари мумкин.

 
Айни вақтда юртимизнинг мева ва сабзавотларидан баҳраманд бўлаётган жирафани Тошкент ҳайвонот боғига ташриф буюрган ҳолда бемалол кўришингиз мумкин.
 
Тошкент ҳайвонот боғи 15 октябрдан 15 апрелгача соат 09:00дан 17:00гача ишлайди. Кириш чиптаси 7 ёшдан 16 ёшгача бўлган болаларга 3000 сўм, 16 ёшдан ошганларга эса 6000 сўмни ташкил этади.