...
МЕНЮ
ONLINE TV

Шерзод Шерматов вазирлик ва идоралар раҳбарларига мурожаат билан чиқди


10:19, 03.09.2018 Жамият
 4 344

Халқ таълими вазири вазирлик ва идора раҳбаридан 5 сентябрь куни қўллаб-қувватлашларини сўраган.

Ўзбекистон Республикаси Халқ таълими вазири ёшларни ўқишга мотивациясини ошириш учун барча вазирликлар ва ҳукумат раҳбарларини биргаликда ҳаракат қилишга чақирди. Вазир ижтимоий тармоқдаги саҳифасида бу ҳақда маълум қилди.
 
Шерзод Шерматовга кўра, Президент томонидан халқ таълими тизимини тубдан яхшилаш бўйича бошланган ташаббусни қўллаш мақсадида барча вазирлик ва идоралар раҳбарларига 5 сентябрь куни ўзлари ўқиган мактабга бориб, янги ўқув йили бошланиши муносабати билан ўтказиладиган тадбирда иштирок этишларини сўраб мурожаат қилган.
 
Унга кўра, мактабдаги тадбирда ҳар бир раҳбар ўзининг ҳаётидан мисоллар келтириб, улар эришган муваффақиятларда мактабдаги таълим ва тарбиянинг роли катта бўлгани, қолаверса, ўқувчиларга мактаб даврида яхши ўқиб, вақтдан унумли фойдаланиш муҳимлиги ҳақида қисқача маъруза қилиб бериш таклифи берилган.
 
“Қувонарлиси, кўпчилик вазирлик ва идоралар раҳбарлари ҳамда жойлардаги ҳокимлар томонидан ушбу таклиф ижобий қабул қилиниб, 5 сентябрь куни мактаблардаги тадбирларда қатнашишга тайёр эканликлари билдирилди.
 
Шунингдек, мактаб битирувчилари орасида ҳаётда кўпчилик ҳавас қиладиган бошқа соҳа вакиллари ҳам кўп. Улар орасида бугунги кунда таниқли тадбиркорлар ва халқ хизматида юрган инсонларнинг жамиятда тутган ўрни беқиёс.
 
Фурсатдан фойдаланиб, уларни ҳам 5 сентябрь куни ўз мактабларига келиб, ёшларни ўз ҳаётий тажрибалари асосида мотивация қилишга ҳисса қўшишга таклиф этамиз. Бу ўқувчиларда ўзи ўқиётган мактабдан фахрланиш туйғуси ҳамда янада яхшироқ ўқишга интилиш шаклланишига ўзига хос туртки бўлади.
 
Мактабларда муаммолар ва қилиниши керак бўлган ишлар жуда кўп, лекин энг асосийси, болаларимизни ўқишга чин дилдан қизиқтира олсак, энг катта натижага эришган бўламиз. Шунда улар қийинчиликларга қарамай ўзлари ўқишга интиладиган бўладилар.
 
Президентимиз томонидан бошланган хайрли ишларга ўз ҳиссангизни қўшганингиз ҳамда ушбу таклифни қўллаб-қувватлаганингиз учун олдиндан миннатдорчилик билдирамиз.
 
PS. Ҳурматли собиқ мактаб битирувчилари, Сиз каби яна бошқа муваффақиятли синфдошларингизни ҳам мазкур таклифга жалб этиш учун ушбу постни дўстларингизга улашинг ҳамда уларни тег қилинг”, деган вазир Шерзод Шерматов.
Суннатилла Абдуллаев

Теглар:Шерзод Шерматов Мактаб Ўқув йили 

Дўстларингиз билан бўлишинг:



Ўхшаш мақолалар


Изоҳлар




Изоҳлар


Биринчи бўлиб ўз фикрингизни қолдиринг!

Тавсия

Сўровлар

Сиз қайси яхна ичимликларни ичасиз?

Барча сўровлар