Журналист бўлиш осонми? “Qalampir.uz” сайтида ишлаш-чи?

Бир қарашда оддий, халқаро ҳаёт, сиёсат, иқтисод, маданият ва санъат ҳамда ижтимоий ҳаётда рўй бераётган воқеаларни ўқувчиларга етказувчи сайтни бошқариш ҳам ташқаридан у қадар оғир кўринмаслиги аниқ. Бугун давр шиддат билан ривожланиб бормоқда. Кечагина одамлар газета, даврий нашрлар, телевидение ва радиосиз ҳаётини тасаввур қилолмаган бўлса, бугунга келиб, унинг ўрнини интернет эгаллади. Бу эса интернет ОАВларига катта имконият бўлиб хизмат қилмоқда. “Qalampir.uz” ҳам айни имкониятларнинг маҳсули, сизнинг эътиборингиз меваси.
 
Сайтимиз ташкил топганига бир ярим йил тўлди. Бу вақт давомида сайт ходимлари сизга минглаб мақолаларни тақдим этдилар. Қайсилари учун мақтов, қайсилари учун танбеҳ эшитдилар. Муаммолар биз сабаб ҳал этилганда, қаламларининг кучидан қувондилар. Асли журналист учун бундан ортиқ мукофот йўқ. Сиз ўқиб турган мақола эса сайтнинг 10000-мақоласи. Бу биз учун катта ютуқ. Зотан сайтимиз ташкил топгандан буён чоп этилган мақолаларнинг ҳеч бирини беэътибор қолдирмадингиз, сизнинг бизга бўлган ишончингиз эса бизга куч, ғайрат ва рақобат майдонида муносиб рақобатдош бўлишдек ишончни берди.
 
Дарвоқе, баъзиларга ёт бўлган муносиб рақобатдошлик масаласига бафуржа тўхталиб ўтсак: “Qalampir.uz” сайти ташкил этилибдики, Ўзбекистонда фаолият юритаётган давлат интернет-нашрларини инобатга олмаганда, ҳеч бир хусусий нашр материалидан яширинча фойдаланмади, плагиатга қўл урмади, бошқа нашрлар жамоасини ва улар меҳнатини ўзиники сингари қадрлади. Аслида фалончи сайт хабар беряпти, деб бировнинг тайёр меҳнатига эга чиқишдан, шу йўсин билан ижтимоий тармоқлардаги саҳифаларимизда ҳам ўқувчиларимиз сонини кўпайтиришдан осони йўқ. Лекин биз бундай ҳолатлардан йироқ турдик. Сабаби жуда оддий. Фалончи хабар беряпти, деб биз кимни алдаймиз, ўзимизними ё бизга ишонч билдирган ўқувчиларимизни? Биз ёзганлардан ўғринча фойдаланиб, ҳатто, номимизни ҳам тилга олмаганларга саломларимиз бўлсин!
 
Ҳа, узоқ дийдиё қилиб юбордингиз, деяпсизми? Йўқ, бу дийдиё эмас, аксинча, бир ярим йилда кўрганларимиз, тажрибамиз синовидан ўтганлар ифодаси. Зотан “Qalampir.uz”да бугунгача 50 дан ортиқ ижодкорлар фаолият юритган бўлса, муносибларигина таҳририят қозонида қайнаяпти. Тезкорлик, батафсиллик, холислик, ишончлилик, воқеанинг ҳеч ким кўрмаган жиҳатларини кўра билиш “Qalampir.uz”га хос десак, муболағага йўйманг.
 
Сайт ходимлари – Бош муҳаррир Бобур Жалолов, мухбирлар Умида Якубова, Дурдона Расулова, Соҳиба Мамадиёрова, Нигина Ҳакимова, Мусулмонбек Иброҳимов, Акмалхон Эшонхонов сабаб “Qalampir.uz” бугунги кунгача етиб келди.
 
“Кадр ортида”гилар – сайт техник ходимлари Ёрқин Самиев, Аюбхон Зиннуров, бош ҳисобчи Умида Содиқова ва кадрлар бўлими бошлиғи Кристина Пфандернинг меҳнати бошқаларникидан заҳматлироқдир.
 
www.uz статистикасига кўра, ўртача ҳисобда кунига 30-35 минг киши сайтга ташриф қилади. Мақолаларни кўриш бўйича эса кундалик статистика эса ўртача 125.000 ташкил этяпти.
 
“Qalampir.uz”га 18 ёшдан 65 ёшгача бўлган кишилар мурожаат қиладилар. Уларнинг асосий қисмини 18-35 ёш оралиғидагилар ташкил этади. Фойдаланувчиларимизнинг 40 фоизи аёллар, 60 фоизи эркаклардир.
 
Сайтга кирувчиларнинг асосий қисми ўзбекистонликлар бўлса, кўплаб фойдаланувчилар Россия, АҚШ, Германия, Қозоғистон, Тожикистон, Қирғизистон, Жанубий Кореядан ташриф буюрадилар.
 
Юқорида санаб ўтган ютуқларимизга ўз-ўзидан эришганимиз йўқ. Тинимсиз меҳнат, ОАВга яратиб берилган кенг имкониятлар, сизнинг эътиборингиз сабаб ғойибона юзлашиш бахтига муяссармиз. Бизга бўлган эътиборингиз сўнмасин. Биз эса бунга муносиб жавоб қайтаришга, албатта, ҳаракат қиламиз.