XX аср фожиаси: сув ҳавзасидаги ҳалокатлар

Болтиқ денгизида эстонларнинг “Эстония” номли йўловчи кемаси сув остига ғарқ бўлди. 852 киши ҳалок бўлди...

• 1904 йил 15 июнь — АҚШнинг Нью­Йорк штатидан оқиб ўтадиган Ист­Ривер дарёсида “Генерал Слокум” номли саёҳатчи кема сув қаърига ғарқ бўлади. Ушбу бахтсиз ҳодиса 1030 кишини ҳаётдан олиб кетади;

• 1912 йилнинг 14 апрелидан 15 апрелига ўтар кечаси — Шимолий Атлантика сатҳида “Титаник” кемаси ҳалокатга юз тутади. Музқоя билан тўқнашув оқибатида рўй берган фожиада 1515 киши йўловчи ва экипаж аъзолари ҳалок бўладилар;

• 1912 йил 28 сентябрь — Япония яримороли қирғоқларида “Кисемару” номли кема чўкиши оқибатида 1000 дан зиёд киши ҳаётдан кўз юмади;

• 1914 йил 29 май — Авлиё Лаврентия дарёсида “Ирландия Қироличаси” номли инглиз кемаси Норвегиянинг юк ташувчи кемаси билан тўқнашиб кетиши оқибатида 1012 киши дарё тубига ғарқ бўлади;

• 1916 йил 26 февраль — Ўртаер денгизида французларнинг “Прованс” ҳарбий кемаси (крейсери) ҳалокатга учраши оқибатида 3100 киши фожиали ўлим топади;

• 1917 йил 6 декабрь — Канаданинг Галифакс шаҳри яқинидаги сув ҳавзасида французларнинг қурол­аслаҳа ортилган “Монблан” кемаси Бельгиянинг “Имо” номли йўловчи кемаси билан тўқнашиши оқибатида фожиа рўй берди. Бахтсиз ҳодиса туфайли 1600 киши вафот этди;

• 1921 йил 18 март — Жанубий Хитой денгизида “Гонконг” номли кема ҳалокатга юз тутиб, 1000 га яқин киши сув қаърига ғарқ бўлди;

• 1944 йил 14 апрель — Ҳиндистоннинг Бомбей шаҳри яқинидаги Араб денгизида “Форт Стайкин” номли кема ҳалокатга учради. Сув транспортининг бортига ортилган қурол­аслаҳалар портлаши оқибатида содир бўлган ушбу фожиа 1300 кишини ҳаётдан олиб кетди;

• 1949 йилнинг ноябрь ойида — аскарларни ҳарбий қисмларга кўчирувчи Хитой армиясига тегишли кема Маньчжури вилояти яқинидаги сув ҳавзаларининг бирида сув тубига ғарқ бўлди. Ҳалокат натижасида 6000 дан зиёд киши қурбон бўлди;

• 1954 йил 26 сентябрь — Япониянинг Хонсю ва Хокайдо ороллари ўртасидаги Цугару кўрфазида “Тоя Мару” номли паром ҳалокатга учраши оқибатида 1172 киши ҳаётдан кўз юмади;

• 1987 йил 20 декабрь — Филиппиннинг “Дона Паз” пароми ва “Виктор” танкери (ёқилғи ташиш кемаси) Таблас кўрфасида тўқнашиб кетиши оқибатида 3000 дан зиёд киши вафот этди;

• 1989 йил 7 апрель — Норвегия қирғоқларида “Комсомолец” номли совет атом сувости кемаси ҳалокатга учраб, 42 нафар денгизчининг ўлимига сабаб бўлди;

• 1994 йил 28 сентябрь — Болтиқ денгизида эстонларнинг “Эстония” номли йўловчи кемаси сув остига ғарқ бўлди. 852 киши ҳалок бўлди.