Ҳафтанинг муҳим воқеалари суратларда

Ўтиб бораётган ҳафтада турли хил мудҳиш воқеалар юз берди. Инсонийликка зид бўлган террорчи гуруҳларнинг ҳаракатлари туфайли юзлаб кишилар қурбон бўлди. Туркияда бир гуруҳ ҳарбийлар давлат тўнтариши ўтказишга ҳаракат қилишди. Она табиат яна бир бор ўз кучини кўрсатди. Францияда байрам мотамга айланди. Бундан ташқари, бир қатор қизиқарли воқеалар ҳам ўтган ҳафта саналарида муҳрланди. Жонажон юртимизда илк бор Халқаро мева-сабзавот ярмаркаси ташкил этилди. Қуйида ҳафтанинг муҳим ва қизиқарли воқеаларини суратларда томоша қилинг.

3 июль санасида Ироқ пойтахти Бағдодда бўлган кучли портлаш натижасида уч юзга яқин одам ҳалок бўлди ва 200дан зиёд одам жароҳат олди. Жабрланганлар орасида 4 ёшли Асал Аҳмад ва унинг онаси ҳам бор эди. Суратда портлаш оқибатида юзидан кучли жароҳатланган Асалнинг юзи боғлаб ташлангани тасвирланган. 2016 йил 10 июль.

 

Хитойнинг Фужиан провинциясида бўлган кучли Непартак тайфунидан сўнг, кўплаб ҳудудлар вайронага айланди. Непартак тайфуни Филиппин, Тайван, Хитойда кузатилди ва саккиз кишининг умрига зомин бўлди. Суратда вайроналар орасида турган аёл. 2016 йил 11 июль.



Италиянинг жанубий қисмида икки йўловчи поезди тўқнашиб кетди. Натижада 25 киши ҳалок бўлди ва бир неча ўнлаб киши жароҳат олди. Суратда тўқнашув оқибатида жиддий шикастланган поездга қараб турган киши. 2016 йил 12 июль.  



Индонезиянинг Проболингго ҳудудидаги Бромо тоғида вулқон отилиши пайтида юзлаб одамлар кратерга жуда яқин келиб, табиат ҳодисасини томоша қилишди. 2016 йил 12 июль.  



Буюк Британиянинг собиқ бош вазири истеъфога чиқишидан олдин Даунинг-стритдаги қароргоҳи олдида чиқиш қилди. Суратда Дэвид Кэмерон ва унинг оиласи. 2016 йил 13 июль.  



Шу ҳафтада Буюк Британиянинг янги бош вазири тайинланди. Бу лавозимга Тереза Мэй сазовор бўлди. Мэй хоним қиролича Елизавета II ҳузурига ташриф буюрди ва расман қиролича уни бош вазир этиб тайинлади. 2016 йил 13 июль.  



Франциянинг Ницца шаҳрида мамлакатнинг миллий байрами – Бастилия кунини нишонлаш пайтида мудҳиш теракт содир этилди. Фалокат оқибатида 84 киши ҳалок бўлди, юздан ортиқ одам жароҳатланди. Суратда теракт воситаси сифатида фойдаланилган ва ўнлаб одамлар умрига зомин бўлган юк машинаси. 2016 йил 14 июль.  



Испанияда кенг нишонланадиган Сан Фермин фестивалининг сўнги куни жуда қизиқарли воқеаларга бой бўлди. Суратда фестивалнинг сўнгги кунида югураётган буқалардан бири йиқилиб тушмоқда, унинг остида эса одам қолиб кетиши мумкин. 2016 йил 14 июль.  



13 июлдан 14 июлга ўтар кечаси Тошкент шаҳрида кузатилган кучли шамол кўп йиллик дарахтларнинг қулашига ва бунинг оқибатида турар-жой бинолари, болалар майдончалари ҳамда фуқароларнинг шахсий автомобилларига зарар етишига сабаб бўлди. Суратда дарахт остида қолган ВАЗ-2106 русумли машина.  



14 июль куни Франция пойтахти Парижда Бастилия куни нишонланиши чоғида Эйфель минорасида мушакбозлик туфайли ёнғин келиб чиқди. Хавф дарҳол баратараф этилди. Суратда Эйфель миносарасининг пастги қисмида пайдо бўлган ёнғин.  



Ўзбекистон Республикаси Президенти Ислом Каримов Халқаро ҳаваскор боксчилар уюшмаси (AIBA) томонидан мукофотланди. Президент 15 июль куни Оқсаройда Халқаро ҳаваскор боксчилар уюшмаси (AIBA) президенти Чинг-Куо Вуни қабул қилди.  



Туркияда давлат тўнатаришига ҳаракат бўлиб ўтди. Бир гуруҳ ҳарбийлар ҳозирги ҳукуматга қарши чиқди ва исён кўтарилди. Тўқнашувлар натижасида 161 киши ҳалок бўлди ва 1440 нафар одам жароҳатланди. Суратда Туркия президенти Ражаб Тойиб Эрдўған Истанбул аэропортида тарафдорлари орасида. 2016 йил 16 июль.  



Ўзбекистонда илк бор Халқаро мева-сабзавот ярмаркаси ташкил этилди. Ярмаркада АҚШ, Буюк Британия, Бирлашган Араб Амирликлари, Жанубий Корея, Япония, Италия, Франция, Малайзия, Ҳиндистон, Россия, Латвия, Озарбайжон, Туркманистон, Эрон, Афғонистон, Қозоғистон каби қирқдан зиёд мамлакатлардан кўплаб халқаро савдо ташкилотлари, савдо-саноат палаталари, қишлоқ хўжалиги соҳасига ихтисослашган вазирлик ва идоралар, логистика компаниялари, мамлакатимизнинг мева-сабзавотчилик соҳасида иш юритувчи корхоналари иштирок этди. 2016 йил 12-16 июль.