Сайлов куни Ўзбекистонда қандай об-ҳаво кутилмоқда?

Ноябрь ойи сўнгги ўн кунлигида ҳаво ҳароратининг кескин тушиб  кетиши ва қор ёғиши ҳамюртларимизни шошириб қўйганди. Декабрь ойи кириб келиши билан ҳарорат яна кўтарила бошлади. Айни вақтда Тошкент шаҳрида ҳарорат 18-20 даража илиқ. 3 декабрь куни ҳам ҳарорат шундай бўлса-да, вақти-вақти билан ёмғир ёғиш эҳтимоли мавжуд. 4 декабрь куни ҳам эрталаб ёмғир ёғади. Ҳарорат 13-15 даража илиқ бўлади. Бу ҳақда Гидрометеорология хизмати хабар қилмоқда.
 
Қорақалпоғистон Республикаси ва Хоразм вилоятида бугун +10+15 даража. 3 декабрь куни ёмғир ёғади. Якшанба куни эса ёғингарчилик кузатилмайди, ҳарорат 8-13 даража илиқ бўлиши кутилмоқда.
 
Бухоро ва Навоий вилоятларида эртага, 3 декабрь куни қисқа муддатли ёмғир ёғади. Ҳарорат 3-8 даража илиқ бўлади. 4 декабрь куни ёғингарчилик кузатилмайди. Ҳаво ҳарорати +13+18 даражага кўтарилиши кутилмоқда.
 
Самарқанд, Жиззах, Сирдарё, Қашқадарё ва Сурхондарё вилоятларида бугун ҳарорат 15-20 даража илиқ. Самарқанд, Жиззах, Сирдарё вилоятларида 3-4 декабрь кунлари ёмғир ёғади. Қашқадарё ва Сурхондарё вилоятида эса 4 декабрь куни ёғингарчилик кутилмайди.
 
Фарғона водийсининг Андижон ва Фарғона вилоятида 4 декабрь куни қисқа муддатли ёмғир ёғиши мумкин. Ўртача ҳаво ҳарорати 8-13 даража илиқ бўлиши кутиляпти.