Обид Асомов Аҳмадбой ҳақидаги кўрсатув учун телеканалларга эътироз билдирди

Аввалроқ, Аҳмадбойга сармоя берган хонандалар рўйхатида номида қайд этилганлардан хонандалар Адҳам Солиев ва Муниса Ризаева ижтимоий тармоқлар орқали мухлисларга мурожаат қилиб, Аҳмад Турсунбоевни умуман танимасликларини айтиб чиқишган эди. Ўтган ҳафта “Тошкент”, “Ўзбекистон”, “Ёшлар” телеканаллари орқали эфирга узатилган “Аҳмад васвасаси” кўрсатувидан кейин Ўзбекистонда хизмат кўрсатган артист Обид Асомов ҳам Аҳмадбойнинг доимий абоненти сифатида тилга тушиб, кўп мулоқотда бўлгани ҳақида гап-сўзлар болалаганди. Бугун қизиқчи Обид Асомов Instagram’даги шахсий саҳифаси орқали Аҳмадбой Турсунбоев ҳақидаги кўрсатув борасида фикр билдирар экан, ТВ ходимларига эътирозини билдирди.
 
“Бугун бутун мамлакатимизда саломдан кейин бир савол: “Кўрдингми?”. Ҳа, яна Аҳмадбой машмашаси... Аслида бу курсатувга муносабат билдирмасдим,лекин телефоним “тутаб” кетди. Бутун дунёдан қўнғироқлар... Мен ҳам кўрдим шу кўрсатувни, фақат баьзи жойларига тушунмадим! Фирибгар ушланибди, жинояти фош бўлибди, жазо олиши муқаррар, лекин... Биз саньаткорлар нима қилиб юрибмиз? Тушунмаган томошабин бизни ҳам ҳамтовоққа чикариб қўйяпти. Айбимиз тўйда хизмат қилганимизми? Аввало тўй ўтган йили, янглишмасам, ноябрь ойида бўлган эди! Менга “Бир бой йигит ўзини фарзандига қўшиб Меҳрибонлик уйидан етим болларни ҳам суннат қилиб беряпти”, дейишди. Жуда катта тўйхона, камида икки минг киши бўлдиёв. Саньаткорлар жуда кўп, ТВга танлаб-танлаб қўйишибди. Тушунаман...
 
Аҳмадбойни ўша куни танидим. Тўйхонада ҳар соҳа вакиллари казо-казолардан тортиб, телевидение ходимларигача бор эди. Одам кўплигидан ИИВ ходимлари тартибга сололмади. Биз саньаткормиз айтилган жойга борамиз. Бизнесменми, олимми, ҳаммолми танланмайди. Ҳурмат қилиб айтилди, уёғи тирикчилик.
 
Энг асосийси, пул берган бойлар йулини топиб кетар, охирги сигирини сотиб топширганлар нима қиларкин? Пули кайтиб берилармикан? Ҳақиқат қарор топишига ишонаман. Шахсан мен ҳеч нарсани у йигитга топширганим йўқ. Лекин ўша тўйдан унутилмас воқеа тўй охирида ўша куни кийган янги туфлигимни кимдир илиб кетди. Аҳмадбой уйдан ўзини туфлигини олиб чиқиб берди. Туфли уйда. Мабодо керак бўлса... Мен йўқотган туфлигимга розиман! Яратган ҳаммамизга инсоф берсин. Ва ниҳоят ТВ ходимларига алоҳида раҳмат. Беш йил ТВда чиқмаганимнинг ҳиссасини чиқаришди, тўртта каналда кетма-кет кўриндим”.