Аҳмаджонов ваъда берди! “Насаф” сақланиб қолинади

Ўзбекистон Миллий олимпия қўмитаси президенти ва ЎФА биринчи вице-президенти бошчилигидаги ишчи гуруҳ “Насаф” клубининг инфратузилмасини кўздан кечирди. Бу ҳақда Миллий олимпия қўмитаси Матбуот хизмати хабар берди.
 
Делегация “Насаф”нинг уй стадиони “Марказий” ўйингоҳ, “Насаф” футбол академияси, “Насаф” футбол клубининг машғулотлар базасига ташриф буюрди.
 
Ташриф давомида Умид Аҳмаджонов “Насаф” клуби раҳбарияти билан учрашиб,  ҳозирги кунда клубда мавжуд муаммоларни муҳокама қилди.


 
“Насаф” клуби футболчилари ва академияда таҳсил олаётган ёш футболчиларга яратилаётган шарт-шароитлар, стадионнинг аҳволи, машқ майдонлари ҳамда академия биносидаги вазиятни кўздан кечириб, камчиликларни бартараф этиш борасида зарур маслаҳатларни берди.
 
Умид Аҳмаджонов “Насаф” клубидаги молиявий муаммолар тез орада бартараф этилишини, клуб оддий ходимидан тортиб раҳбариятгача барча ойлик маошларини тўлиқ олишларини таъминлашга ваъда бериб, бу масалани ҳал қилиш учун охиригача боришини айтиб ўтди.


 
“Насаф” клуби Қашқадарё футболининг юраги эканини, ҳамда бу клуб иштирокисиз Суперлига ўйинларини тасаввур қилиб бўлмаслигини алоҳида таъкидлаб, Суперлига учрашувларини томоша қилиш учун стадионга ташриф буюрадиган мухлислар учун барча қулайликларни яратиш зарурлигини қўшимча қилиб ўтди.
 
Эслатиб ўтамиз, аввалроқ Умид Аҳмаджонов “Насаф”нинг молиявий муаммолари тез орада ҳал этилиши учун ҳаракат қилаётгани ҳақида маълумот берган эдик.