Расман! “Пахтакор” австралиялик футболчи билан шартнома имзолади

Аввалроқ, Тошкентнинг “Пахтакор” клуби ўз таркибига Англияда туғилган футболчи Ростин Гриффитс билан шартнома имзолаши  ҳақида хабар берган эдик.
 
Бугун, 10 август куни “Пахтакор” стадионида ўтган матбуот анжуманида жамоанинг янги футболчиси ОАВ вакиллари ва мухлисларга таништирилди.
 
Таништирув маросимида клубнинг грузиялик бош мураббийи Шота Арвеладзе иштирок этди.


 
“Пахтакор” осиёлик футболчи лимитини Ростин Гриффитс билан тўлдирди ва биз бундан хурсандмиз. Унинг ўйинларини кузатдим ва клубга чақиришга қарор қилдим. Ростин тажрибали футболчи ва клубга ёрдам беришига умид қиламиз”, – дейди Шота Арвеладзе.
 
Шунингдек, австралиялик футболчи қандай қилиб “Пахтакор” аъзосига айлангани ва ўзбек футболи ҳақида сўзлаб берди.


 
“Пахтакор” бош мураббийи менга таклиф билан чиқди ва уни қабул қилдим. Жамоа ўз олдига аниқ мақсадларни қўйди: Осиё Чемпионлар Лигасида ғалаба қозониш ва Ўзбекистон чемпионатида юқори натижаларга эришиш. Айнан шу омиллар мени ўзига жалб қилди ва Ўзбекистонга келдим. Ўзбек футболидан хабардорман, Хитойда тўп сурганимда ўзбекистонлик футболчиларга қарши ўйнаганман. Улар кучли техника ва маҳоратга эга”, – дейди “Пахтакор”нинг янги футболчиси Ростин Гриффитс.
 
Маълумот учун, 80-рақамли либосда майдонга тушадиган  Гриффитс “Пахтакор” билан 1,5 йиллик шартнома имзолади.
 
Ростин Гриффитс ҳақида маълумот:
Туғилган санаси: 10.03.1988 й
 
Туғилган жойи: Сток-он-Трент, Англия
 
Фуқаролиги: Австралия
 
Бўйи: 187 см
 
Амплуаси: Ярим ҳимоячи.