ЖЧ-2018. Жаҳон чемпионатида фақат битта “Б” қолди

Жаҳон чемпионатининг чорак финалидан ўрин олган Бразилия ҳамда Бельгия терма жамоалари ўртасидаги ўйинда Европа вакилларининг қўли баланд келди.
 
Учрашув бразилияликларнинг кетма-кет ҳужумлари билан бошланди, бироқ биринчи бўлиб гол уриш Бельгия терма жамоасига насиб этди. 13-дақиқада Носир Шадли бурчакдан тўпни жарима майдонига ошириб берди, у ерда Фернандиньо тўпни қайтаришда хатога йўл қўйди ва ўз дарвозасини ишғол қилиб қўйди.
 
Шундан сўнг ҳам Бразилия футболчилари ҳужум ташкил қилишдан тўхташмади, бироқ ҳимоячиларнинг зич ҳаракати ва Тибо Куртуанинг сейвлари бельгияликларни голлардан сақлаб қолди.
 
31-дақиқа ўтиб бораётган бир вақтда Бельгия қарши ҳужумдан унумли фойдаланди, тўпни майдон марказида қабул қилиб олган Ромелу Лукаку якка курашда Фернандиньони ортда қолдирди ва тўпни Кевин Де Брюйнега узатди, ярим ҳимоячи жарима майдони ташқарисидан кучли зарба йўллаб, жамоасининг иккинчи голини урди. Жамоалар танаффусга шу ҳисобда чиқиб кетишди.
 
Иккинчи бўлим ҳам тўлиқ Бразилия устунлигида ўтди ва Бельгия барча вакиллари билан ҳимояланди. Ўйиннинг 76-дақиқасида Ренато Аугосто Филиппе Коутиньонинг узатмасидан сўнг боши билан дарвозани ишғол қилди ва ҳисобни қисқартирди.
 
ЖЧ-2018. 1/4 финал.
Бразилия – Бельгия 1:2.
Голлар: Ренато Аугусто (76) – Фернандиньо (13, автогол), Де Брюйне (31).
 
Бразилия – Алиссон, Тиаго Силва, Марсело, Фагнер, Миранда, Паулиньо (Ренато Аугусто, 73), Фернандиньо, Коутиньо, Виллиан (Фирмино, 46), Неймар, Габриэл Жезус (Дуглас Коста, 58).
 
Бельгия – Куртуа, Компани, Вертонген, Менье, Алдервейрелд, Феллайни, Шадли (Вермален, 83), де Брюйне, Витцель, Азар, Лукаку (Тилеманс, 87).
 
Огоҳлантиришлар: Алдервейрелд (47), Менье (71), Фернандиньо (85), Фагнер (90)