Кеча, 10 декабрь куни Берлин шаҳрида ҳам Трампнинг Қуддусни Исроилнинг пойтахти тан олганлиги тўғрисидаги қарорига нисбатан, 2,5 минг кишилик оммавий норозилик намойиши бўлиб ўтган.
АҚШ президенти Дональд Трампнинг Қуддус шаҳри бўйича қабул қилган қарори, бутун дунёда норозиликларни келтириб чиқараётгани тўғрисида хабар берган эдик.
РИА “Новости” ахборот агентлигининг Германиянинг Bild нашрига асосланиб тарқатган хабарига кўра, кеча Берлин шаҳрида ҳам Трампнинг Қуддусни Исроилнинг пойтахти тан олганлиги тўғрисидаги қарорига нисбатан, 2,5 минг кишилик оммавий норозилик намойиши бўлиб ўтган. Намойишчилар Исроил давлатининг байроғини ёқишган.
Шунингдек, худди шундай намойиш Нойкёльн округида ҳам бўлиб ўтган. Полиция томонидан 11 нафар намойишчи ушланган. Шундай намойишлар жума куни Берлиннинг Бранденбург дарвозасида ҳам ўтказилган эди. Германия расмий ҳукумати бу намойишларни қоралади.
Германия Ички ишлар вазири Томас де Мезьер “Биз яҳудийларни ёки Исроил давлатини бундай, шармандали равишда ҳақорат қилишни қабул қилолмаймиз”, деган фикрни билдирди. Адлия вазири Хайко Маас эса, “Биз яҳудийликка қарши курашишга йўл қўймаслигимиз керак, яҳудийликка қарши қаратилган ҳар қандай ҳужум, бизнинг барчамизга қаратилган ҳужумдир”, деб баёнот берган.
Бундан олдинроқ, АҚШ президенти Дональд Трамп Қуддусни Исроилнинг пойтахти, деб расмий тан олингани ҳамда Америка элчихонасини Тель-Авивдан Қуддусга кўчириш тўғрисидаги қарорни имзолаган эди. АҚШ давлат раҳбарининг бу қарори фақат Исроилда ижобий кутиб олинди.
Дунёнинг кўплаб давлатлари бу қарорга ўз норозиликларни билдиришди, Яқин Шарқ давлатларида эса жуда кескин қаршиликлар билан кутиб олинди ҳамда ҳозирги вақтгача бўлган тўқнашувларда жуда кўплаб кишиларнинг жабрланишига сабаб бўлди.
Обил Сафаров
