Гитлернинг севимли актрисаси СССР жосуси бўлганми?

Марика Рёкк ўз даврининг энг ёрқин юлдузи эди. Унинг омади нацизм порлаган палла – 1933 йилга тўғри келди:
 
Ўша йили Universum Film AG компанияси Рёкк билан шартнома тузди ва тез орада у мюзиклларнинг чинакам юлдузига айланди.
 

 
Марика Рёкк 1913 йилнинг 3 ноябрида Қоҳирада, меъмор ва қурувчи Эдуард Рёкк ва Мария Каролина Шарлотта оиласида дунёга келди. Орадан кўп ўтмай, унинг оиласи Венгрияга, 1924 йилда эса Францияга кўчиб кетади.
 
Марика Парижда рақс сирларини ўрганди. 1925-1929 йилларда АҚШ бўйлаб гастрол сафарларида бўлди. Кейин Европага қайтиб, Монте-Карло, Берлин, Лондон, Париж, Канн, Будапешт ва Вена саҳналарига чиқди.
 
Рёккнинг кинодаги дебюти 1930 йилга тўғри келади, аммо машҳурликка 1935 йилда илк немис фильми бўлмиш “Енгил кавалерия”да роль ижро этгач эришди.
 
У 1940 йилда немис режиссёри Георг Якобига турмушга чиқди. 1941 йилда суратга олинган илк рангли немис фильми – “Аёллар – барибир энг яхши дипломатлар”да роль ижро этди.
 
Турмуш ўртоғи Георг Якоби 1944 йилда тасвирга туширган “Орзуимдаги қиз” мусиқали комедияси Рёккага катта муваффақият келтирди. Бу фильм ҳатто Совет Иттифоқида ҳам намойиш этилди.
 
Чунки картинада нацизм тимсоллари кўрсатилмаган ва Учинчи Рейхни эсга соладиган ҳеч нарса йўқ эди. Фильм ижодкорлари уруш қайси томоннинг ҳисобига ҳал бўлаётганини кўра олган эдилар.
 

 
Марика Рёкк 2004 йилнинг 16 майида 91 ёшида Вена яқинидаги уйида оламдан ўтди. Вафотидан 13 йил ўтиб, унинг ҳаётига оид шов-шувли хабар тарқалди: “Guardian” нашрининг Германия федерал разведка хизмати ошкор этган маълумотларга таяниб ёзишича, немис актрисаси совет жосуси бўлган.
 
“У совет разведкаси билан ҳамкорлик қилган менежери Хайнц Хоффмайстер туфайли Давлат хавфсизлик қўмитаси (ДХҚ) агентига айланган бўлиши мумкин, – дея ёзади нуфузли нашр.
 
Аммо Рёккнинг роли нимадан иборат бўлгани ва қандай маълумотларни бериши мумкин бўлгани тўлиқ аниқ эмас.  
 
Мақолада айтилишича, Марика Рёкк “Тож” деб аталган совет агентлик тармоғининг аъзоси бўлган. Ушбу тармоқ орқали совет разведкасига ўта муҳим ҳарбий маълумотлар, жумладан, Германиянинг “Барбаросса” операцияси ва Курск жангига оид режалари етказилган.
 
Ушбу тармоққа жами 35 агент – банкчилар, ҳарбий мулозимлар ва актрисалар аъзо бўлишган. Айтиш керакки, совет разведкачиси Ян Черняк бошчилигидаги “Тож” анча самарали фаолият кўрсатган бўлиб, Немис контрразведкаси 11 йил давомида тармоқнинг бирорта ҳам агентини аниқлай олмаган. “Тож” орқали биргина 1944 йилда 12 500 варақ техник ҳужжат ва 60 намунадаги радиоаппаратура Совет Иттифоқига етказилган.
 
Ҳозирги Германия разведка хизматининг отаси ҳисобланмиш “Гелен” ташкилоти 1951 йилдаёқ актриса Рёккнинг махфий фаолиятидан хабар топган. 1951 ноябридаги разведка ҳужжатида актрисанинг советлар билан алоқаси ҳақида айтиб ўтилган.
 
Ўша йили Рёкк 16 йиллик кинодаги фаолиятига якун ясаганини ва бундан кейин вақтини Дюссельдорфдаги шоҳона дўконда ўтказишини эълон қилди. Аммо разведканинг таъкидлашича, бу аслида ДХҚ билан ишлашни лавом эттириш учун ниқоб эди, холос.
 

 
Немис кинематографияси Голливуд билан рақобатлашиш истар, шунинг учун Будапештда вояга етган истеъдодли актриса-раққоса фильмларга таклиф этилар эди.
 
Айтилишича, у Адольф Гитлернинг энг севимли актрисаларидан бири ва Учинчи рейхнинг тарғибот вазири Йозеф Геббельснинг маъшуқаси бўлган.
 
Рёккни нафақат истеъдоди, балки уни экзотик актриса қилиб кўрсатадиган венгерча шеваси учун ҳам яхши кўришар эди.
 
Айни пайт Берлин кино музейида сақланаётган 1940 йилга оид қайдда Марика Рёкк тақдим этилган гуллар учун Гитлерга самимий миннатдорчилик билдирган.