Давлат раҳбарлари Туркияга ҳамдардлик билдирдилар

17 февраль,  чоршанба куни Анқарада содир бўлган теракт муносабати билан  дунёнинг бир қатор давлат раҳбарлари  Туркияга чуқур ҳамдардлик билдирдилар. Бу ҳақда “Dailysabah” хабар берди
 
Германия канцлери Ангела Меркель  Анқарадаги терактни кескин қоралади.   Канцлернинг айтишича,  у бўлган воқеадан даҳшатга тушган ва унинг бутун  ўй-хаёли  теракт қурбонлари ва жабрдийдаларининг оилалари билан бўлган
“Мен турк халқига барча германияликлар сизнинг дардингизга шерик эканлигини билдирмоқчиман”, – дейди канцлер.
 
Европа Иттифоқининг  Олий вакили ва вице-президенти Федерика Могерини ва ЕИ комиссари Йоханнес Хахн  бўлиб ўтган воқеаларга ўз муносабатларини билдирар эканлар, турк халқига ва ҳукуматига  уларни қўллаб-қувватлашга  доим тайёр эканларини маълум қилдилар.  
 
“Биз бу оғир дамларда зўравонлик ва терроризмдан азият чеккан Туркия  ва унинг халқи билан  биргамиз”, –  дейилади  уларнинг  ҳамдардлик  мактубида.
 
Озарбайжон  Президенти  Илҳом Алиев  ҳам телефон орқали Туркия Президенти Эрдўғанга чуқур ҳамдардлик билдирди.   Эрдўған 18 февраль куни Бокуга ташриф буюришни режалаштирган эди,   Анқарадаги қўпорувчилик ҳаракатларидан сўнг  ташрифни бекор қилди.
 
Покистон Ташқи ишлар вазирлиги ҳам бўлиб ўтган воқеани қоралаб Туркияга ҳамдардлик билдирди.
“Туркиянинг қардош халқига ва ҳукуматига чуқур тазия билдирамиз”, – дейилади ҳамдардлик мактубида.
 
НАТО Бош котиби Йенс Столтенберг  Туркия ҳукумати ва халқига ҳамдардлигини билдирди.  Унинг айтишича,  НАТОнинг аъзо давлатлари терроризмга қарши елкама-елка туриб курашади.
 
Бундан ташқари АҚШ,  Буюк Британиянинг  Туркиядаги элчилари  Жон Басс,   Ричард Мур ва бошқалар Туркияга  чуқур ҳамдардлик билдирдилар.

Руслан Сулаймонов