Александр Лукашенко Шавкат Мирзиёевга ўзаро ҳамкорликдан манфаатдор эканлигини билдирди

Мамлакатимизда 4 декабрда ўтказилган сайловда Тадбиркорлар ва ишбилармонлар ҳаракати – Ўзбекистон  Либерал-демократик партиясидан номзод Шавкат Мирзиёев Ўзбекистон Республикаси Президенти этиб сайлангани муносабати билан хорижий давлатлар, халқаро ташкилотлар номидан самимий қутлов мактублари келишда давом этмоқда.
 
Хусусан, Беларусь Республикаси президенти Александр Лукашенко ҳам ўз табрик мактубини йўллади.
 
Ўзбекистон Республикасининг сайланган Президенти 

Шавкат Мирзиёев Жаноби Олийларига 

Муҳтарам Шавкат Миромонович! 

Сизни Ўзбекистон Республикаси Президенти этиб сайланганингиз билан чин қалбимдан самимий табриклайман. 

Овоз бериш якунлари юртдошларингиз Сизнинг мамлакатда ижтимоий-иқтисодий барқарорликни таъминлаш ва халқ фаровонлигини юксалтиришга қаратилган бунёдкорлик ишларингизни ижобий баҳолашидан далолатдир. 

Беларусь – Ўзбекистон ҳамкорлигини кенгайтириш борасида амалий мулоқот ва самарали ишларни биргаликда давом эттиришдан манфаатдормиз. 

Муҳтарам Шавкат Миромонович, Сизга мустаҳкам соғлик, Ўзбекистон Республикасининг фаровонлиги учун белгиланган барча режаларни амалга оширишда, олий давлат лавозимида улкан муваффақиятлар тилайман. 

Эҳтиром билан, 


Александр Лукашенко,
Беларусь Республикаси Президенти