Хавфсизлик Кенгаши раиси Кенгашнинг фаолиятига умумий раҳбарликни амалга оширади ва БМТ котибияти кўмагида Кенгашнинг кунлик ишларининг бажарилишини таъминлайди.
Келаётган 2018 йилнинг 1 январидан 31 январигача Қозоғистон ўз тарихида биринчи марта БМТ Хавфсизлик Кенгашига раислик қилади.
Хавфсизлик Кенгаши раиси Кенгашнинг фаолиятига умумий раҳбарликни амалга оширади ва БМТ котибияти кўмагида Кенгашнинг кунлик ишларининг бажарилишини таъминлайди. Кенгаш раиси Хавфсизлик Кенгаши аъзолари билан келишилган масалалар бўйича баёнотлар беради. Шунингдек, Хавфсизлик Кенгаши биронта муҳим ҳужжат бўйича келишувга эришганида, матбуот олдида чиқиш қилади.
2018 йилнинг 2 январь куни БМТ Хавфсизлик Кенгашида доимий аъзо давлатлар вакиллари иштирокида январь ойига мўлжалланган иш режаси муҳокама қилинади. Қозоғистоннинг ташаббуси билан Кенгашнинг доимий бўлмаган аъзолигига икки йиллик муддатга сайланган Кот - д'Ивуар, Қувайт, Нидерландия, Перу, Польша, Экваториал Гвинея давлатларининг байроқларини расмий ўрнатиш тадбири ўтказилади.
18 январь куни Қозоғистон Республикаси президенти Нурсултон Назарбоев раҳбарлигида Хавфсизлик Кенгашининг доимий аъзолари иштирокида “Оммавий қирғин қуролларини тарқатмаслик: ишонч чоралари” мавзуида дебатлар ташкил қилинади.
19 январда Афғонистон ва Марказий Осиё давлатлари Ташқи ишлар вазирлари иштирокида “Марказий Осиё ва Афғонистонда минтақавий ҳамкорликни барпо этиш хавфсизлик ва тараққиётнинг ўзаро боғлиқлиги модели сифатида” вазирлар дебати бўлиб ўтади. Бунда БМТ Хавфсизлик Кенгашининг доимий аъзо давлатлари ташқи ишлар вазирлари ҳам қатнашади.
Қозоғистоннинг 2017-2018 йилда БМТ Хавфсизлик Кенгашининг доимий бўлмаган аъзоси сифатида устувор ҳисоблаган масалалари Қозоғистон Республикаси президентининг БМТ Хавфсизлик Кенгашига қилган “Қозоғистоннинг хавфсиз, адолатли, ривожланаётган дунёни барпо этиш учун глобал ҳамкорликни мустаҳкамлашга доир қарашлари”, деб номланган мурожаатида белгилаб берилган. Булар қуйидагилардир: I) ядро қуролидан ҳоли бўлган дунёни барпо этиш; II) глобал урушлар таҳдидини бартараф этиш ва минтақавий можароларга барҳам бериш; III) минтақавий хавфсизлик ва ҳамкорликни мустаҳкамлашда Марказий Осиё манфаатларини ҳимоя қилиш; IV) террорчиликка қарши курашиш; V) Африкада тинчлик ва хавфсизлик масалалари; VI) хавфсизлик ва барқарор ривожланишнинг ўзаро алоқадорлигини узлуксиз таъминлаш; VII) Хавфсизлик Кенгаши ва БМТ бутун тизимининг XXI аср чақириқ ва таҳдидларига жавоб бера олишини таъминлаш.
БМТ Хавфсизлик кенгашида раислик қилиш олий мақом ҳисобланади. Чунки, Хавфсизлик Кенгаши БМТ низомига кўра, ер юзида халқаро хавфсизлик ҳамда тинчликни таъминлаш учун асосий жавобгар ҳисобланади ва унинг қарорларига барча аъзо давлатлар бўйсуниши шарт.
Обил Сафаров
