Видео: Роналду ёки Месси, қайси бири жамоада етакчи?

Каталониянинг “Барселона” клуби Европа чемпионлар лигаси чорак финал жавоб баҳсида “Рома”га имкониятни бой бериб мусобақани тарк этди.
 
Зеро, каталонияликлар ўз майдонида ўтказган ўйинда катта устунлик билан рақибларини мағлуб этганди. Аммо Италиядаги баҳс умуман кутилмаган натижа билан якунланди.
 
Римликлар ҳақиқий ирода кўрсатиб, учта голли фарқни йўққа чиқарди ва ярим финалда “Ливерпуль” билан ўйнаш ҳуқуқини қўлга киритди.
 
Хуллас, “Барселона” ва Мессини жорий мавсум Европа чемпионлар лигасидаги иштирокини бошқа кўрмаймиз.
 
“Реал”да эса вазият сал бошқача. Ҳа, мадридликлар “Ювентус” тўсиғидан аранг ўтиб олишди. Туриндаги дастлабки матчда йирик ҳисобга эришган “қироллик клуби” жавоб ўйинида қандай қийналиб ва қандай ярим финалга йўлланма олганини кўрдингиз.
 
Футбол жамоатчилиги ҳам сўнгги дақиқалардаги пенальти хато белгиланганини таъкидламоқда. Бу вазият кўплаб мухлисларнинг бир-бири билан муҳокама қилишига сабаб бўлмоқда. Лекин охирги қарорни ҳакам чиқариб бўлди, “Реал” – ярим финалда ўйнайди.
 
Шубҳасиз, энди “Барселона” ва “Реал”нинг чорак финалдаги икки ўйини кўпроқ ёдимизда сақланиб қолади. Чунки “Барса” кутилмаганда синди, “Реал” эса кутилмаганда синдирди.
 
Икки клуб етакчилари Роналду ва Месси бир ўйинда жамоасининг учта гол ўтказиб юборганини ўз кўзи билан кўрди ва табиийки, бундан хурсанд ҳам бўлмади.


 
Хўш, сиз нима деб ўйлайсиз? “Рома” “Барселона”га гол урганда Мессининг муносабати қандай бўлди-ю, “Ювентус” гол урганда Роналдунинг муносабати қандай бўлди.
 
Ҳа, яна ўша одатий савол жамоада ким етакчи Роналду ёки Месси? Бу саволга ушбу видеони кўриш орқали жавоб олишингиз мумкин.
  Албатта, шахсий фикрларингизни мақола остига ёзиб қолдиришга ҳақлисиз.