“Комсомольская правда” нашри Тожикистондан “ҳайдаб” чиқарилди

Тожикистонда “Комсомольская правда” (КП) газетасининг фаолияти тўхтатилди. Бунга газетада Тожикистон – “Равшан ва Жамшуд давлати” деб аталгани сабаб бўлган. Бу ҳақда КПнинг республикадаги ҳамкори ва “Тожикистон” газетасининг бош муҳаррири Шариф Ҳамдампур маълум қилди.
 
2016 йилнинг 16 июлида “Kp.ru” сайтида “Тожикистон: совет давридаги турғунликдан ёрқин келажак сари” номи остида мақола чоп этилди. Унда россиялик журналист Сергей Пономарёвнинг Тожикистонга хизмат сафари билан келиши ҳақида сўз борган.



“Мақолани ўқиб чиққач, шуни тушундимки, у на журналистика этикасига, на профессионал нормаларга мос келади. Мақолада тожикларни ва бутун миллатни ҳақоратлайдиган фактлар берилган.  Шу билан бирга Равшан ва Жамшуд исмлари тилга олинган”,  дейди Ҳамдампур. 
 
Унинг сўзарига кўра, у мақолани ўқигач, дарҳол газета раҳбарияти билан алоқага чиққан ва материалдаги касбий этика юзасидан  ўз фикрларини билдирган. КП раҳбарияти мақолага доир чора кўришга ваъда берган, лекин ҳеч қандай жавоб келмаган.
 
“Улар икки соат ичида бу масалани муҳокама этиб, ўз фикрларини билдиришни айтишди. Аммо, бир неча кундан буён бу мақолага доир ҳеч қандай чора кўрилмади. Икки кун ўтгач, мен бу газетанинг Тожикистондаги фаолиятига чек қўйишга қарор қилдим. Бу менинг фуқаролик позициямдир”, дейди Ҳамдампур.
 
“Комсомольская правда” газетаси 2006 йилдан буён Тожикистонда фаолият олиб бораётган эди.

 

Маълумот ўрнида, “Равшан ва Жамшуд” Россияда суратга олинган ҳажвий хусусиятга эга “Наша Раша” фильмидаги қаҳрамонлар ҳисобланади. Унда Тожикистондан келган икки мигрант-ишчининг ҳаёти ва саргузаштлари ҳақида ҳикоя қилинади. Россиядаги тожикистонлик ишчи-мигрантлар бу фильмни ҳақоратли деб қабул қилишади.