...
МЕНЮ
ONLINE TV

Давлат тест маркази абитуриентларнинг вазифалари, мажбуриятлари ва ҳуқуқлари ҳақида эслатма берди


16:38, 28.07.2017 Жамият
 3 080

Абитуриент тест синовларини ўтказиш жараёни юзасидаги эътирозларини Давлат тест марказига ариза орқали маълум қилиши мумкин.

Давлат тест маркази абитуриентларга тест синовларини ўтказиш тартиб-қоидалари, шунингдек, уларнинг вазифалари, мажбуриятлари ва ҳуқуқлари тўғрисида эслатма берди.
 
Унда айтилишича, абитуриентлар тест синовлари ўтказиладиган куни бино ҳудудига соат 8.00 гача, аудиторияга соат 8.30 гача фақат абитуриент рухсатномаси ва паспорти билан киритилади. Соат 8.30 дан кейин келган абитуриент аудиторияга киритилмайди.
 
Абитуриентлар соат 8.30 дан 9.00 гача жавоблар варақасини тўғри тўлдириш тартиби билан таништирилади. Тегишли жойга сўралган маълумотлар ёзилади. Бу жараён тест ўтказиш учун ажратилган вақт меъёрига кирмайди.
 
Тест бошланганидан кейин ҳеч ким аудиторияга киритилмайди ва тест топшириқлари бўйича абитуриентлар билан савол-жавоб қилмайди.
 
Жавоблар варақаси рақами билан саволлар китоби рақамининг бир-бирига мослигини ва саволлар китобида фанлар бўйича тест саволларида типографик хато ёки бошқа нуқсонлар текширилади. Тест саволларида нуқсон ёки камчилик аниқланса, бу ҳақда аудитория раҳбарига хабар берилади.
 
Абитуриент жавоблар варақаси берилгандан кейин абитуриент рухсатномаси ва титул варақасининг тегишли жойларига жавоблар варақаси рақамини кўчириб ёзади.
 
Абитуриент жавоблар варақасининг 1-блокига ва саволлар китоби муқовасининг белгиланган жойига ўзи ҳақидаги тегишли маълумотларни ёзиб, имзо қўяди. Агар абитуриент томонидан ушбу маълумотлар киритилмаган бўлса, ихтиёрий босқичда далолатнома тузилади ва тест синови бўйича натижа чиқарилмаслигига асос бўлади.
 
Саволлар китобидаги ҳар бир фан 36 та топшириқни ўз ичига олади. Ундаги тест топшириқларини бажариш учун 72 саволга — 2 соат, 108 саволга — 3 соат вақт белгиланган. Жавоблар варақасини тўлдиришга тест синови учун белгиланган вақт меъёрига қўшимча 20 дақиқа берилади.
 
Ҳар бир саволга 4 тадан (“А”, “Б”, “C”, “Д”) жавоблар варианти берилган бўлиб, абитуриент улардан фақат биттасини саволлар китобчасида белгилаши (саволлар китобида белгиланган жавобларни ўзгартириш мумкин), кейинчалик жавоблар варақасининг мос фан блокидаги доирачани белгиланган тартибда бўяши керак (жавоблар варақасида белгиланган жавобларни ўзгартириш мумкин эмас).
 
Ҳар бир тест саволига фақат битта жавоб белгиланиши шарт. Агар жавоблар варақасидаги “Белгилаш учун намуна” қоидасига риоя этилмаса, жумладан битта саволга жавоблар варақасида тегишли доирача бўялмаса ёки икки ва ундан ортиқ доирача бўялса ёки тўлиқ бўялмаса ушбу жавобга балл берилмайди.
 
Жавоблар варақаси ҳаво ранг пастали шарикли ручка билан тўлдирилади.
 
Жавоблар варақаси тўғри тўлдирилиши учун абитуриент шахсан жавобгардир. Тегишли доирачаларни нотўғри белгилаганда эътироз кўриб чиқилмайди.
 
Ҳар галгидек, абитуриент томонидан уяли телефонлар ва бошқа алоқа воситаларини олиб кириш ва фойдаланиш қатъий ман этилади.
 
Диққат қилинг! Тест синовлари ўтказиладиган бинога киришда абитуриентда микрокалкулятор, луғат, жадвал, китоб, уяли телефон, компютер, телекоммуникация воситалари ва шпаргалкалар мавжудлиги аниқланса улар бинога киритилмайди ва тегишли далолатнома тузилиб, тест жараёнидан четлаштирилади.
 
Тест синови жараёнида абитуриент томонидан саволлар китоби варағи йиртиб олинганлиги аниқланса, тест синовларини топшириш қоидалари бузилган ҳисобланади ва тест синовидан четлаштирилади.
 
Белгиланган вақтда тест синовларига келмаган абитуриентлар учун қўшимча тест синовлари ўтказилмайди.
 
Тест синовларини топшириш вақтида абитуриентнинг аудиториядан чиқиши тақиқланади, аудиториядан чиққан абитуриентлар қайтадан тест синовларига қўйилмайди, соғлиғининг ёмонлашиши ва бошқа шу каби ҳолатларда тест материалларисиз қават бўйича вакил кузатуви остида аудиториядан чиқиш ҳоллари бундан мустасно.
 
Аудитория раҳбари томонидан тестни бажариш учун ажратилган вақт тугагани ва саволлар китобидан жавоблар варақасининг мос доирачаларига бўяш учун қўшимча берилган йигирма дақиқалик вақт бошланганлиги эълон қилинганда абитуриент саволлар китоби билан ишлашни тўхтатиб, саволлар китобидан жавоблар варақасининг мос доирачаларини бўяшни бошлаши, қўшимча ажратилган вақт тугагани эълон қилинганда жавоблар варақаси билан ишлашни тўхтатиши шарт.
 
Абитуриент тест саволлари ёки тест синовларини ўтказиш жараёни юзасидан эътирозлари мавжуд бўлганда, тест материалларини топширганидан сўнг, шу куннинг ўзида қабул комиссияси, Давлат тест марказининг таълим муассасаси ёки бино бўйича вакили орқали Давлат тест марказига ариза билан мурожаат қилиши мумкин.
Мусулмонбек Иброҳимов

Теглар:Абитуриент ДТМ Тест синовлари 

Дўстларингиз билан бўлишинг:



Ўхшаш мақолалар


Изоҳлар




Изоҳлар


Биринчи бўлиб ўз фикрингизни қолдиринг!

Тавсия

Сўровлар

qalampir.uz сайтини баҳоланг!

Барча сўровлар